Húsmæðraorlof

Þá eru Ásgeir og Katrín komin til Íslands!  Fóru í gær og gekk bara ágætlega að mestu.  Pabbinn var með 3ja klst. skemmtipakka í töskunni fyrir flugið sem hann hefði geta sleppt.  Við flugtak kom nefnilega í ljós að dóttir mín er flughrædd.  Henni leist ekkert á þessi ósköp, kúrði sig bara hjá pabba sínum og sofnaði að lokum.   Vaknaði svo eftir klukkutíma og sat bara stillt og prúð í sætinu sínu og spjallaði!  Vel uppalin finnst ykkur ekki!

Þannig að nú hefst “húsmæðraorlofið” mitt.  Get ræktað letingjann í mér nætu tvær vikurnar á milli vakta.  Já, þið munið finna mig í sófanum.  Er reyndar með stórhreingerningu á listanum mínum….  Ótrúlega hljótt hérna núna, hálf leiðinlegt verð ég að segja.

Kem heim sunnudaginn 1. júlí þegar sumarfríið mitt byrjar!!!  Ég hlakka svo til Ætla að fara í sund og fá mér almennilega pítsu!

Höfum annars haft það með ágætum hér að undanförnu.  Veðrið búið að vera frábært og búið er að fjárfesta í sundlaug fyrir Katrínu.  Hefur notið sín vel í henni í hitanum.

Jæja kæru vinir, sjáumst í júlí!

Þá er nú gott að búa í útlöndum!!!

Halló allir!

Jæja við fórum í dag og pöntuðum nýjan bíl.  Það var sko ekki leiðinlegt!  Vildi helst skilja gamla skrjóðinn eftir og fá nýja bílinn STRAX!  En við þurfum að bíða fram á föstudag…haldið þið að fókusinn haldi það út???  Þannig að það verður rúntað um helgina með RIX fm í botni og höndina út um gluggann.

Fengum annars frábærar fréttir í dag.  Ásgeir er búinn að fá samninginn sinn framlengdan og fær að vera hér amk þangað til hann er orðinn sérfræðingur!  Þar af leiðandi er ljóst að við munum vera í Uppsala næstu árin.

Komst annars að því um helgina að við búum í “hættulegu” hverfi.  Það er búið að setja neonbleik skilti út um allt þar sem stendur…I det här området säljs alkohol dygnet rundt, blandt annat till 13 åringar!!  Ekki það að við höfum orðið vör við þessa sölu.  Erum þó farin að líta grunsamlega á pabba sem eru úti á göngu með barnavagna, kalla sem eru alltaf að þvo bílana sína og konur sem eru endalaust í garðinum sínum.  Þetta er náttúrulega mjög grunsamlegt athæfi.

Húsmóðirnin er svo aftur orðin nútímakona.  Fékk nýjan gsm síma í dag eftir að hafa verið símalaus í næstum eitt og hálft ár.  Frekar frumstætt…  Flottur sími og það besta við hann er að hann er með útvarpi!  Vissi nú ekki einu sinni að það væri til.  Held eiginlega að ég eigi eftir að nota útvarpið meira en símann.

Sem sagt bara nokkuð góður mánudagur!

koss og knús til ykkar allra!

Sumardagurinn fyrsti

Bloggletin virðist hafa náð tökum á mér á ný!  Ætli það lesi einhver þessa síðu ennþá???

Jæja, sumardagurinn fyrsti var í dag!  Hér í Uppsala var ekta sumardags fyrsta veður, rigning, rok og kalt   Fannst ég vera komin heim, så skönt!

Annars er allt gott að frétta héðan.  Katrínu flýgur áfram í sænskunni, hún er farin að tala nánast eingöngu sænsku á leikskólanum þó einstök íslensk orð læðist inn á milli.  Okkur finnst hún hins vegar farin að blanda mjög mikið saman hérna heima.  Mamma! ég vil fá den!  og ég vil sitta här!  Þetta er hálf fyndið.  Samt vill maður nú ekki að barnið sitt fari að “syngja” íslenskuna.  Fóstrunarar á leikskólanum er að athuga með íslenskukennara fyrir hana.  Það er víst eitthvað sem börn eiga rétt á hér, svo sósíalt!

Sænska skattaskýrslan er komin!  Við Ásgeir höfum gefist upp og ákveðið að kalla á hjálp!  Kann einhver á sænska skattinn???

Svo erum við búin að ákveða að kaupa nýjan bíl, jibbíííí!  Orðin frekar þreytt á gamla bílnum og hitinn um síðustu helgi var óþægileg áminning á mikilvægi loftkælingar í Svíaríki.  Fyrir valinu varð Ford Mondeo, sannkölluð glæsikerrra!  Förum á mánudaginn og göngum frá kaupunum   Þeir vildu hins vega ekki gefa okkur mikið fyrir gamla Fókusinn okkar en jæja…

Erum svo að skipuleggja sumarfríið okkar.  Hver veit nema að við komum heim!!!

Jæja ætla að fara að horfa á djävulen bär prada eða the devil wears prada sem við fengum á póstvídeóleiginni í dag.  Ójá, hér kemur ALLT með póstinum.

Sumar, sól og ís!

Úje!  Það er komið sumar hér í Uppsala!

Fórum og heimsóttum Sunnerstabændurna í gær og fengum okkur ís á veröndinni.  Katrín braut að vísu upp það partý að lokum og sagði Katrín ætlar inn, mér er kalt….  Urðu víkingarnir að vera sammála barninu og flýttu sér inn.

Í dag var hins vegar yfir 20 stiga hiti í sólinni þannig að þetta er allt að koma.  Stuttermabolaveður!

Annars lærði Katrín ósið af sænska ríkissjónvarpinu á föstudagskvöldið!  Við vorum að horfa á Så ska det låta sem er sambærilegur þáttur við Hemma Gunn þáttinn heima.  Nú þarna tekur einn gestanna upp á því að “tala með rassinum”, beygði sig fram og hreyfði kinnarnar.  Voða fyndið.  En eftir þáttinn sjáum við Katrínu beygja sig fram og gera nákvæmlega það sama og sagði Katrín gera eins og kallinn.  Við náttúrulega sprungum úr hlátri sem gerði þetta ennþá fyndnara í hennar augum!  Nú er hún búin að gera þetta nokkrum sinnum.  Hver sagði að það væri slæmt fyrir börn að horfa á sjónvarp!  Ég sem hélt að sænska ettan væri nú nokkuð skothelt!

Bíllinn í viðgerð á morgun og við Ásgeir í fríi!  Hver veit nema að við getum farið í sólbað

….

Jæja ætli það sé ekki kominn tími á smá fréttaskot!

Bíllinn er kominn úr viðgerð.  Sluppum nokkuð vel og ég var bara nokkuð sátt við reikninginn.  Reyndar tilkynntu þeir okkur að drif…eitthvað væri trasigt og að við þyrftum að skipta um það bráðlega.  Nú já!  og það kostar 11 tusend spänn!  Ómæ!  Þannig að nú verður farið í það að leita að nýjum bíl og vonandi náum við að skipta áður en drifdótið gefur upp öndina….

Reyndar fagnaði húsmóðirin lágum viðgerðarreikningi með því að keyra utan í staur!  Fór hliðarspegillinn heldur illa úr þeirri meðferð og er nú í molum.  Ég kenni að sjálfsögðu fáránlega litlum stæðum og asnalega staðsettum staurum í bílastæðahúsi Akademiska um!!  og hananú….  Þannig að nú á fókusinn okkar tíma á verkstæði á þriðjudaginn.  Er farin að hallast að því að hann fari bara á haugana í vor!

Fengum svo góða heimsókn um daginn.  Anna og Hörðu komu til okkar og mikið var nú gott að fá þau í heimskókn.  Hörður sló í gegn hjá Katrínu enda kom hann með cherios, páskaegg og latabæjarsegla á ísskápinn.  Það þarf væntanlega ekki að taka það fram að daman krafðist þess að borða páskaeggið NÚNA!  og það þýddi ekkert að reyna að fela það fram að páskum, hún mundi sko alveg eftir því!  Anna var ekki síður vinsæl og fengum við foreldrarnir lítið að koma nálægt barninu þessa helgi, bara Anna frænka!  Soldið notalegt verð ég að segja.

Nú bíðum við spennt eftir næstu heimsókn um páskana þegar Katrín fær ömmu og afa í heimskókn.  Eiríkur granni spurði hana einmitt um daginn hvað maður fengi á páskunum og þá sagði mín AFA!!!  Vissulega var verið að fiska eftir páskaeggjum og vonumst við nú eftir slíku góðgæti.

Annars finnst okkur Katrín verða sænskari með hverjum deginum.  Hún er farin að segja heilar setningar á sænsku og er farin að tala miklu meira á leikskólanum.  Reyndar er hún líka farin að blanda svolítið saman.  Er t.d. nánast hætt að segja ekki, segir bara inte og mjölk en ekki mjólk.  Fósturnar segja samt að þetta sé ekkert til að hafa áhyggjur af og að þetta gangi yfir þegar hún verður komin betur inn í sænskuna.

Jæja ætli það sé ekki komið nóg af bulli í bili og svo er líka Lost að byrja.

Koss og knús kæru vinir!

Elín

Bíllinn…

…er bilaður!  Fór að hósta og hiksta í gær og er núna á verkstæði .  Við sem vorum að vonast til að hann myndi endast fram á vor þegar við gætum selt hann.  Þurfum nefnilega að eiga bílinn í 1 ár vegna þess að við fluttum hann frá Íslandi, megum hvorki selja hann né henda honum!  Það góða er að við fengum tíma á verkstæði samdægurs og það telst lúxus hér í Svíþjóðinni!  Ásgeir náði að keyra bílinn með herkjum til læknis og sótti bílaleigubíl í leiðinni…..  Þoli ekki að standa í svona veseni og vil helst ekki hugsa til þess hvað þetta kemur til með að kosta!

 Núna lætur húsmóðirin sig dreyma um nýjan bíl!  Með loftkælingu að sjálfsögðu!  Hver veit nema að við verðum eins og aðrir Svenssonar í vor og komin á Volvo V70????

Rigning í dag.  Er nú yfirleitt ekki hrifin af því en það þýðir að snjórinn er að fara og veðrið að skána   Í tilefni af því var keypt bikiní á prinsessuna og hún vildi að sjálfsögðu æfa sig hér heima í kvöld.  Fór á ströndina, eins og Guðfinna gerir!  En þær stöllur fara oft saman á ströndina….inni í stofu

Er í fríi á morgun þannig að við mæðgur ætlum að sofa út….vonandi til 8! 

Vor???

Jæja!  Ætli það sé ekki kominn tími á smá færslu!  Frekar lítið líf á síðunni að undanförnu.  Hef reyndar verið að spá í hætta að skrifa hérna þar sem ég er frekar löt við það….en við sjáum til!

Janúar og febrúar haf liðið á ógnarhraða enda í nógu að snúast við að pússla saman vinnu, barni og heimili   En þetta hefur allt saman gengið ljómandi vel.  Katrín fór t.d. í pössun í fyrsta skipti um daginn þegar við Ásgeir áttum bæði að vera á vakt.  Við bjuggumst við svaka sprengju hjá dömunni en hún skemmti sér konunglega.  Sýndi sínar bestu hliðar og virtist bara vera nokkuð vel uppalin   Hún fékk að fara til Þurýar og fjölskyldu á laugardagskvöldi, var samt ekki til í að gista og sagðist ætla að fara heim þegar hún væri búin í vinnunni!  Síðan vaknaði hún hjá Guðrúnu á sunnudagsmorgni, sagði bara hissa Guðrún!  og ekkert mál hjá minni dömu.  Katrín er sko frekar mikil mömmustelpa sem skýrir kannski undrun okkar Ásgeir á málinu en hún kemur okkur alltaf jafn mikið á óvart.

Annars er vor í lofti hér í Uppsala.  Það hefur hlýnað mjög mikið síðustu vikuna og snjórinn á undanhaldi.  Opnuðum glugga um helgina og það er ábyggilega í fyrsta skipti síðan í nóvember!  Er frekar fegnin enda engin áhugamaður um snjómokstur og kulda!

Fáum svo heimsókn um helgina.  Anna og Hörður ætla að koma og við hlökkum mikið til að fá þau til okkar.  Munum ábyggilega fá okkur nokkra öl

Jæja kæra fólk, fleira er ekki í fréttum í bili!

Jólamyndirnar komnar

Þá er loksins búið að setja inn jólamyndirnar á barnaland.  Amman tók sig til og skellti þeim inn….greinilega allir bissí á þessu heimili!

Frekar kuldalegt hér í Uppsala núna.  Held að það hafi farið alveg niður í -20° frost um daginn!!!  brrrrr…….  Húsmóðirin er því farin að klæðast ullarnærfötum og dúnúlpu en er samt kalt!

Katrín fór á þotu um helgina, fannst voðalega gaman að láta draga sig en leist ekkert á að fara að renna niður brekku!!  Skiljanlega….stórhættulegt .  En það tókst nú samt að telja henni trú um að það væri svakalega gaman og hún fór nokkrar ferðir.  Sagi alltaf Katrín grallari!!  Frekar fyndið.

Fórum svo í afmælisveislu til Guðfinnu í dag sem varð 5 ára!!!  Það var mikið stuð á skvísunum þangað til að blaðra sprakk í fanginu á Katrínu.  Jösses hvað hún varð skelkuð yfir því.

Annars gengur lífið bara sinn vanagang!  Er í fríi á morgun og við mæðgur ætlum að “sofa út”, vona að skvísan sofi til amk níu.  Eru það kannski bara draumórar???

Ekki lengur húsmóðir!

Jæja, lifði af fyrstu vikuna í vinnunni, úff!  Þetta gekk nú bara alveg ágætlega held ég.  Smá brestir í sænskunni minni en ekkert hættulegt.  Líst bara vel á þetta, verður ábyggilega mjög gaman þegar ég er komin inn í jobbið og get talað sænsku án þess að hugsa um hvert orð fyrirfram…

Katrín stóð sig eins og hetja á leikskólanum.  Svo dugleg!  Var reyndar frekar þreytt þegar ég sótti hana á fimmtudaginn.  Helgin hefur því farið í afslöppun og smá tiltekt!  Mjög notalegt og gott.

Hér hefur kyngt niður snjó síðan á laugardag.  Eiginlega fyrsti alvöru snjórinn í vetur.  Amk þurfti Ásgeir að moka í dag!  Ætum ekki að vera einu íbúarnir í götunni sem moka ekki eins og í Västerås

Framundan er kvöldvakt og tvær morgunvaktir og svo er ég að vinna næstu helgi!

Kveðja, Uppsalagengið