Þrettándinn!

Jólin barasta búin!  Mikið er nú gott að þau eru bara einu sinni á ári, eins og einhver sagði!

Jólaskrautið var plokkað niður í gær (smá svindl í gangi), jólatréð fór líka til heimkynna sinna fyrr í vikunni eftir að húsmóðirin var orðin þreytt á barrinu í stofunni!  og lífið komið í sínar föstu skorður…eða svona hér um bil!

Katrín er búin að vera hinn mesti unglingur um jólin, farið seint í háttin og sofið út!  Núna tekur við baráttan við að snúa þessu við.  Hún fékk einmitt ekkert að leggja sig í dag og litla músin var svoooo þreytt!  Náði að stela smá lúr í sófanum yfir Latabæ en var vakin fljótt aftur!  En núna er hún sofnuð, kl. 8.  Þannig að framundan er kósíkvöld hjá skötuhjúunum, rauðvín og Da Vinci code.  Hef reyndar aldrei verið hrifin af Tom Hanks, en við sjáum til….

Ásgeir byrjar svo að vinna aftur á morgun.  Spennó!

That´s all folks!

1. janúar 2007!!!

Gleðilegt nýtt ár kæru vinir og takk fyrir það gamla!!!

Við höfum haft það rosalega gott yfir jólin. Famílían nældi sér reyndar í smá pest rétt fyrir jól en við létum það ekki á okkur fá! Allir hressir þegar hangikjötið var borið fram á aðfangadagskvöld Katrín var alveg í essinu sínu, hangikjötið vakti að vísu ekki mikla hrifningu en möndulugrauturinn þótti góður svo ég tali nú ekki um heimagerði ísinn! Eftir matinn var snúið sér að pökkunum. Katrín vissi nú ekki alveg hvað hún átti að gera við þetta pakkaflóð og fannst þetta mjög merkilegt! Þegar hver pakki var opnaður þurfti að skoða innihaldið nákvæmlega, setja saman dótið eða máta fötin og síðan var hægt að snúa sér að þeim næsta Alveg frábært að fylgjast með henni! Og takk kærlega fyrir okkur!!!

Á jóladag borðuðum við svo kalkún að hætti ömmu og andabringur á annan í jólum. Síðan héldu veisluhöld í mat og drykk áfram þangað til mamma, pabbi og Siggi fóru þann 30.!! Alveg frábært að hafa þau hér yfir jólin Katrín var mikil ömmustelpa og fyrstu dagana kom ekki annað til greina en að amma skipti á hverri einustu bleyju og færi með hana í háttinn. Sem sagt lúxus fyrir foreldrana Því miður var hún reyndar líka svo góð við ömmu og afa að hún tók það ekki í mál að vekja þau á morgnana, nei! mamma og pabbi áttu að fara fram úr og amma og afi að sofa lengur…

Í gær fórum við svo í áramótaveislu til Guðrúnar og Eíríks sem búa líka hér við Kiselvägen! Alveg frábært kvöld og ekki spilltu kræsingarnar fyrir . Katrín reyndist þó vera með lítið hjarta þegar kom að flugeldunum. Þó Svíarnir megi nú teljast fram úr hófi hógværir með sprengingar leist henni ekkert á þessi læti! Kúrði sig bara í mömmu og vildi varla kíkja út um gluggann! En hér var annars allt orðið kyrrt um hálf eitt og fólk farið að sofa….nema dóttir mín, hún var í stuði til tvö um nóttina! Held bara að hún hafi aldri vakað svona lengi! Mín hefur líka verið frekar framlág í dag og það reyndist þrautinni þyngri að vekja hana eftir lúrinn sinn.

Annars mætti nú segja að árið 2006 hafi verið frekar viðburðarríkt hjá okkur! Látum okkur sjá….

• Í janúar hélt Ásgeir á vit ævintýranna og byrjaði að vinna í Västerås. Í heilan mánuð svaf hann á þunnri dýnu úr IKEA meðan búslóðinni var pakkað í gám heima á Fróni! Held að þetta sé mánuður sem hann mun seint gleyma.
• Í febrúar mættu mæðgurnar á svæðið ásamt fríðu föruneyti og að ógleymdri búslóðinni! Hafist var handa við að koma sér fyrir og þá var maður orðin húsmóðir í Svíþjóð eða hemmafru!
• Í mars var ennþá kalt og mikill snjór, brrrr…. Mæðgurnar fóru að mæta á opinn leikskóla og húsmóðirin reyndi að lära sig svenska! Ásgeir fékk þá líka stöðu í Uppsala frá og með janúar 2007!
• Í apríl tók að vora í Svíþjóð og famílían fór að huga að flutningum á nýjan leik. Húsnæðisleit í Uppsala byrjaði.
• Í maí festum við kaup á slottinu! eftir að hafa skoðað áður nokkra “kofa” við mismikla hrifningu dugði ekkert annað en glænýtt úr kassanum Katrín fékk leikskólapláss í Uppsala frá og með haustinu.
• Í júní fór húsbóndinn í sumarfrí og eftir að hafa sleikt sólina í Sverige var haldið heim á Frónið í rigninguna, sem er náttúrulega toppurinn á tilverunni. Þennan mánuð ákváðu hjónaleysin líka að fyrir næsta sumar yrðu fest kaup á bíl með loftkælingu, annað er ekki sniðugt!
• Í júlí og ágúst voru mæðgurnar heima á Íslandi en Ásgeir hélt aftur til Svíþjóðar. Húsmóðirin fór að vinna á Hrafnistu og naut lífsins á hótel mömmu!
• Í september fóru mæðgurnar aftur til Svíþjóðar. Fljótlega eftir komu okkar til Svíaríki var hafist handa við að pakka á nýjan leik. Um miðjan mánuðinn fengum við svo húsið afhent og fluttum inn! Svo einfalt var það, hmmm…. Katrín byrjaði líka á leikskólanum í lok mánaðarins.
• Í október og nóvember vorum við að stússast í nýja húsinu, farið var í þó nokkrar IKEA og Bauhaus ferðið, húsbóndanum til ómældrar ánægju! Húsmóðirin fékk líka vinnu frá og með janúar 2007!
• Í desember komu svo jólin með tilheyrandi! Ásgeir hætti svo að vinna í Västerås 22. des og nú erum við að njóta þess að eiga smá frí áður en við byrjum bæði að vinna.
• Á árinu fengum við líka margar frábærar heimsóknir! Þið sem hafið ekki komið eruð að sjálfsögðu velkomin á nýju ári og þið hin aftur Verð á gistingu er ekki hátt, kannski bara 1 stk lambalæri og cherios handa heimasætunni!

Jæja, þar hafið þið það! Spurning hvort næsta ár verði jafn viðburðarríkt??? Amk eru spennandi tímar fram undan. Húsmóðirin mun hætta að vera húsmóðir, eða svona næstum því, og byrja að vinna. Ásgeir byrjar á nýjum vinnustað og Katrín á nýjum leikskóla. Annað verðr svo bara að koma í ljós

Held að þetta sé orðið lengsta blogg sem ég hef á ævinni skrifað og læt þetta því gott heita í bili!

Bestu kveðjur frá familíunni í Uppsala!

Gleðileg jól!

Þá er jólahangikjötið komið í ofninn, tréð skreytt, búið að pakka inn pökkunum og ekki rykarða í húsinu!  Nú er bara að bíða eftir að geta belgt út magann og ráðist á pakkana

Siggi og Ásgeir eru á leiðinni út á Arlanda að sækja pabba, auðvitað smá seinkun á fluginu.  Katrín sefur úti í kerru, gott að hvíla sig fyrir kvöldið.  Núna er Kalle Anka í sjónvarpinu en sænsk jól byrja á því að allir sitja saman og horfa á Kalle Anka.

Jæja kæru vinir!  Við óskum ykkur gleðilegra jóla og farsældar á nýju ári.  Takk fyrir það gamla og svo framvegis!  Hittumst hress á nýju ári

Jólaknús!

Elín, Ásgeir og Katrín

Jólasnjórinn…

…er kominn og farinn! Samkvæmt Svíunum verða því Skánsk jól í ár, enginn snjór og ekkert svo kalt.  Og ég sem hélt að hér kæmi alltaf alvöru jólasnjór…  Komst líka að því í gær og í dag að hér er alveg jafn mikil jólageðveiki og heima.  Alveg stappa af fólki niðri í miðbæ og umferðin … ómg!!!  Svíarnir eru líka alveg jafn frekir umferðinni og íslendingar nema hér gildir ekki að sá sem á stærsta jeppann kemst fyrst, heldur sá sem er á flottasta Volvónum!  En við Ásgeir erum með þá kenningu að Volvóeigendur séu frekastir

Nú erum við Katrín að bíða eftir að geta sótt mömmu og Sigga út á flugvöll, rúmlega 6 tíma seinkun þar þakka ykkur fyrir!  Vona að það verði ekki svona seinkun á aðfangadag þegar pabbi kemur svo hangikjötið verði nú serverað á skikkanlegum tíma!  Svo veit ég líka um litla dömu sem á eftir að verða frekar spennt þegar hún sér alla pakkana undir trénu
Vöknuðum annars með hrikalegt kvef í morgun.  Held að ég sé búin að snýta mér á 30 sek. fresti í allan dag!  Finnst verst að bragðskynið er alveg farið og ég sem var búin að hlakka svo til að fá malt og appelsín! týpískt…en vonandi verður það nú komið fyrir jól!

Jæja kæru vinir, þangað til næst!

Elín

Nýtt rúm

Heimasætan fékk nýtt rúm í vikunni enda löngu vaxin upp úr rimlarúminu sínu.  Rúmið var reyndar pantað fyrir 6 vikum síðan þegar ungfrúin lagði blátt bann við að sofa í eigin rúmi!  Þið sem þekkið skvísuna vitið jú hvað hún er ákveðin og stundum hefur hún betur í baráttunni við foreldrana.  Hún hefur því sofið í mömmu og pabba rúmi undanfarnar vikur sem náttúrulega miklu betra!… En rúmið er sem sagt komið og til að auka á spenninginn fyrir nýja rúminu var keypt prinsessusængurver, prinsessukoddi og prinsessupúðu, prinsessur eru sko inn núna!  En fyrstu nóttuna þegar henni bauðst að sofa í nýja rúminu sagði mín bara NEI! sofa þarna og benti á mömmu og pabba rúm… omg! dugði sem sagt ekki að kaupa nýtt rúm.  Í kvöld ætlaði ég bara að fara með hana í okkar rúm og bjóða henni að sofa þar enda Ásgeir á næturvakt og notalegt að hafa hana uppí.  Þá sagði hún NEI! sofa í prinsessurúminu og þar sefur hún núna á prinsessupúðanum sínum með prinsessusængina og með Steina apa í fanginu!

En svona lítur rúmið út, hennar er reyndar með brík að framan svo að hún detti nú ekki fram úr.  Seinna getum við svo sett fætur undir rúmið og aukið gólfplássið í herberginu, ótrúlega sniðugt!

Annars er helgin búin að vera nokkuð góð.  Dr. Árni kom í heimsókn til okkar í gær eða Addinn eins og Katrín kallar hann!  Í því tilefni var steikt lambalæri, íslenst að sjálfsögðu, namminamm og sænski jólabjórinn kannaður.  Katrín var í hörkustuði til að ganga ellefu enda Addinn mikill vinur hennar!  Í dag var svo jólaglögg hjá Eiríki og Guðrúnu.  Þau tóku sig til og buðu öllum sem búa við götuna yfir til sín í dag.  Ótrúlega sniðugt hjá þeim og þarna fékk maður tækifæri til að kynnast grönnum sínum betur!

Núna er Ásgeir á síðustu vaktinni í Västerås, takk fyrir!  Þá á hann bara eftir að vinna út næstu viku og svo er það bara hejdå Västerås.

Fúlt!

Komst að því í vikunni að það stendur til að loka leikskólanum hennar Katrínar, fúlt   Ég hugsaði, ok þeir hljóta þá bara að loka eftir sumarfrí, ekkert vit í því að gera það núna.  Fékk svo bréf í gær þar sem henni bauðst pláss á öðrum leikskóla, frá 2007-01-09!  Ég hugsaði flott! þetta verður þá bara eftir sumarfrí.  En nei mín las þetta náttúrulega vitlaust og hún á að byrja 9. janúar!   Það munaði minnstu að ég hringdi á leikskólaskrifstofuna eða hvað þetta nú heitir og hellt minni íslensku reiði yfir þær!  Ég er bara ekki að skilja þetta.  Finnst frekar fúlt að láta 1 og 2ja ára börn á ákveðinn leikskóla og loka honum svo nokkrum mánuðum síðar!  En það er víst búið að ákveða þetta og ekkert sem maður getur gert.  Þessi skóli er víst ekki ekonomiskt bra!  Já ótrúlega sniðugt að gera miklar breytingar á húsnæðinu í haust og loka svo!!!  Þannig að í staðinn fyrir að byrsta mig við leikskóla yfirvöld hér í Uppsala tjái ég mig bara um þetta hér… Vona bara að þetta eigi eftir að ganga vel hjá Katrínu.

Kveðja frá húsmóður í vondu skapi!

Hjálp…!

….hvernig nær maður vaxlitamálverki af parketi???  Katrín var voðalega stillt og góð að leika sér uppi áðan og þegar ég kom upp sá ég þetta fína málverk á stigapallinum!  Það fauk vel í húsmóðurina og sem sagði reiðilega við barnið hvað er nú þetta???  Hún brosti voða sætt til mömmu sinnar og sagði Katrín teikna stafinn sinn, þetta er Ká!!!  Næstum því ekki hægt að vera reiður   En nú eru góð ráð dýr!  Þó myndin sé vissulega fín vil ég nú helst reyna að ná henni af nýja, fína parketinu mínu!

Uppsalalucian krýnd!

Uppsalalucian var krýnd í dag og við familían létum okkur ekki vanta! Verð nú að segja að þetta var ekkert voðalega merkilegt en hvað gerir maður ekki fyrir blessuð börnin. Gleymdum reyndar myndavél en Lucian var voða sæt og með alvöru kerti á höfðnu. Var pínu hissa á að Svíarnir hafi ekki parkerað slökkviliðsbíl við hliðina á sviðinu. Katrínu fannst reyndar sænska halllærisbandið sem fylgdi á eftir mun skemmtilegra en lucian og dansaði í takt við tónlistina. Svo hitti hún líka Guðfinnu vinkonu sína og þær stöllur fengu sér kanelbullu saman!

Síðan var haldið heim og jólaísinn lagaður! Held að hann hafi bara tekist nokkuð vel þrátt fyrir að ógifta húsmóðirin eigi ekki hrærivél. Annars verð ég nú að viðurkenna að jólaskapið er seint á ferðinni í ár. Svíarnir eru mjög hógværir í jólaskreytingum. Hér er ekki sería í hverjum glugga og ALLAR seríur sem maður sér eru hvítar. Spurning hvort það sér einhver sólíalismi þar í gangi. Allir að hafa eins þið vitið. Vantar líka alveg kókjólaauglýsingarnar í sjónvarpið og Birgitttu Haukdal að segja manni að versla í Smáralind… En þetta hlýtur að koma

En hér er Uppsalalucian og vinkonur hennar!

Skypið komið í gang!

Erum komin með skype aftur!  Fengum okkur svaka flotta græju, þráðlausan skype síma!  Allt er nú til segi ég bara…  Þannig að nú er bara að hringja eða skæpa.  Þetta átti nú reyndar að vera jólagjöf en við erum eins og litlu börnin og gátum ekki beðið…kannski bara verri!  Svona lítur græjan út, nú get ég sett í þvottavél og talað á skypinu, lúxus

Jólin koma…

Jólalyktin er komin í hús!  Hangikjöt var soðið í gær og í dag var okkur illt í maganum…en svona eru jólin, er það ekki?  Verst að geta ekki skolað þessu niður með malti og appelsíni, kók er bara ekki jafn gott með hangikjötinu.  Katrínu fannst hangikjötið ekki gott!  Sagði bara ekki gott og spítti því út úr sér!  Annars eru þetta fyrstu jólin í langan tíma sem engin próf eru framundan!  Söknuður?  Kannski pínu, það var nú alltaf voðalega mikið fjör hjá okkur þarna í Eirbergi fyrir próf!  Mikið hlegið og minna lært…og marga pítsur pantaðar á Eldsmiðjunni.  Ohh það var svooo gaman.  Besta grínið sem ég man eftir var þegar ein okkar fór með mynd af Guðrúnu Kristjáns í vasanum á jólahlaðborð, hehehe, smá einkahúmor!  Þetta ættu þá líka að vera jólin sem 20 sortir af smákökum verða bakaðar og allt þrifið hátt og lágt EN jæja kannski seinna.

Höfum annars verið nokkuð framkvæmdaglöð síðustu vikuna.  Íslendingarnir á Kiselvägen einangruðu geymslunar sínar um síðustu helgi.  Þeir voru duglegir strákarnir og ráku inn rúmlega 1000 nagla!  Ekki mikið mál, eða hvað?  Í gær settum við svo seríur á svalirnar, það var reyndar aðeins minna mál og tók mun styttri tíma!  Jólahreingerningin bíður enn og viðrist ekkert vera fara frá mér, það verður kannski verkefni næstu viku?  Eða á ég bara að bíða eftir mömmu?

Prinsessan á heimilunu er hress þessa dagana.  Er farin að vera aftur ánægð á leikskólanum enda hefur hún Sigga litla með sér!  Hann skilur íslensku og því góður félagi og fer aldrei langt frá henni.  Hún talar ennþá bara íslensku á leikskólanum og fer svo að hlæja þegar fóstrunar skilja hana ekki!  En þetta er allt að koma hjá henni, alltaf ný og ný sænsk orð að bætast við orðaforðann.  Við vorum að segja henni frá jólasveinunum um daginn og að hún fengi pakka í skóinn ef hún væri stillt og góð.  Þá sagði hún bara að Katrín ætti jólasveininn! og þá á hann líklegast bara að gera það sem hún segir og hananú!  Hún hefur sko heraga á sínum dúkkum, setti Hjöddu dúkku í rúmið um daginn og sagði henni að liggja kjurr annars fengi hún ekkert að sofa hér!  Svo kemur vertu stillt! og neineineinei, það mætti stundum halda að maður væri alltaf eitthvað að skammast í henni.

Jæja kæru vinir læt þetta duga í bili, heyrumst síðar!